شهادة حق عن كتب الأب متى المسكين
لما كنت ماسك مكتبة الاستعارة في الكنيسة كنت باخد كتب ابونا متى واخليها في رف "ممنوع من الاستعارة" علشان التعاليم الفاسدة الهرطوقية اللي فيها محدش يقراها ويتأثر بيها وتنتشر بين الناس ويضلوا وراها.. احنا مش ناقصين.
وكان اللي بييجي يسأل عن كتب ليه كنت بنتهره علشان ميقراش الكلام الفارغ ده وبقوله كلام من نوعية ( يعني هي ضاقت عليك ما المكتبة مليانه كتب محترمة غير كتب ابونا متى) وكان عندي غيره شديدة ضده، كنت "حامي ايمان" صغير من بتوع اليومين دول 😒
ده كان تفكيري لفترة طويلة من الزمن غالبا كانت فترة العشرينات من عمري.
لكن كان الفضول بياخدني بحكم قعدتي كتير في المكتبة اني امسك كتبه وارصد بنفسي كل العك اللي فيها ☺️
الكلام ده كان في التسعينات.
لغاية ما بدأت اقرا ترجمات الاباء المصدرة من مركز دراسات الاباء( مركز القديس انطونيوس للدراسات الابائية) واحضر اللقاءات اللي بيعملوها في مقرهم في ميدان المحكمة
وكانت الصدمة 😳
كتابات الاباء تقريبا متطابقة مع كتابات ابونا متى !! ازاي ده
بقيت امسك كتب ابونا متى اقراها تاني علشان اثبت لنفسي اني غلطان والذاكرة خانتني !!
وكل ما اقرا اكتر لابونا متى كل ما ينور جوايا نور غريب، الكلام اللي بقراه مش مجرد معلومات بيستعرض بيها علينا، ده كلام شخص مختبر المسيح، مش كلام عادي اقراه وانساه وميسبش تأثير.
وبدأت رحلتي مع كتاباته لكن بذهن وعيون مختلفة، عيون مبتدئ تحت اقدام احد كواكب البرية، اتذوق كل كلمه كظمآن وجد نبع ماء صافي فضرب خيمته بجوار النبع حتى لا يرجع للعطش مرة اخرى.
إرسال تعليق