10 كنائس وكاتدرائيات وأديرة مصرية لازم تزورها على الأقل ولو لمرة واحدة في حياتك

تحتوي مصرنا الحبيبة على العديد من أقدم الكنائس والكاتدرائيات والأديرة وأهمها تاريخياً في العالم.

ومش مهم تكون مصري أو مسيحي علشان تقدر قيمة وتاريخ أماكن العبادة دي اللى بترجع لقرون مضت، أو لجمال المعمار والفن للمباني الحديثة منها.فتقدر تلاقى العديد من هذه الكنائس في القاهرة والاسكندرية، وبعضها في مدن تانية، وبتمتد العمارة القبطية بطول المدن والبلاد الى ان تصل الى سيناء. ولكن مهما كانت المسافة لازم على الأقل تزور الكنائس والكاتدرائيات والأديرة دى ولو مرة واحدة.

1- كنيسة الكهف (او كنيسة مارمرقس)

في سنة 979م في عهد الخليفة المعز لدين الله الفاطمي والبابا الأنبا ابرآم السريانى البطريرك الثانى والستين (62) تم نقل جبل المقطم على يد القديس سمعان الدباغ ( او المشهور بسمعان الخراز) وعلى جبل المقطم تم انشاء حى كبير جدا اسمه حى المقطم في القاهرة وفى الحي ده دير قبطي كبير جدا روعة وغاية في الجمال اسمه دير القديس سمعان الخراز 

وجوه الدير كنيسة فريدة من نوعها ولا تشبه اى كنيسة تانية في مصر او العالم من الناحية الفنية اسمها كنيسة الكهف او (كنيسة مار مرقس ) تم اكتشافها سنة 1974 م ككهف او مغارة كبيرة مليانة بالحجارة وتم بناءها بالوضع الحالي سنة 1992 بجانب مجمع الدير اللى بيتكون من عدة كنائس بتحتوى كنيسة الكهف على قاعة رئيسية محفورة في الجبل بتستوعب اكثر من 2000 شخص 

وفى العصر الحالي الدير مش بس مكان للصلاة، بل هو مركز تعليمي وروضة للأطفال ومدرسة للصم والبكم بجانب خدمات تانية كتير بيقدمها الدير لكل سكان حى المقطم بدون تمييز.

2- . "الكنيسة المعلقة بمصر القديمة

واحدة من أشهر الآثار القبطية في مصر، وبتمتاز بطراز معماري نادرجدا جعلها من أجمل الكنائس في الشرق الأوسط، اتخذت مكانا للعبادة من قبل القرن الخامس الميلادي، فضلا عن مكانتها الحديثة كأول مقر للبطاركة في القاهرة بعد ما تم نقله من اسكندرية للقاهرة. والكنيسة المعلقة هي جزء من موقع التراث العالمي التابع لليونسكو

ومكانها بالتحديد في شارع مارجرجس في حي مصر القديمة، واتبنت على أنقاض كانت احتمت فيها العائلة المقدسة السيدة مريم العذراء، والسيد المسيح الطفل، والقديس يوسف النجار، خلال الثلاث سنيين اللى قضوها في مصر لما هربوا من هيرودس اللى امر بقتل أطفال بيت لحم.

بتحمل اسم "الكنيسة المعلقة" بسبب موقعها على برجين من بقايا الحصن الروماني القديم المعروف بحصن بابليون، والذي تم بناؤه في عهد الإمبراطور تراجان في القرن الثاني الميلادي، وكان الغرض من البرجين هو المراقبة ، واتبنى كل برج على شكل حدوة حصان، الكنيسة مبنية فوق برج وجزء من البرج التاني ، وكان ارتفاع البرجين يصل إلى 13 مترا وبسبب الارتفاع العالى ده اتسمت الكنيسة بـ الكنيسة المعلقة وحاليا تعتبر الكنيسة على نفس مستوى سطح الارض بسبب ارتفاع الأرض على مدار اكثر من الـ 1500 عام.

وتعتبر الكنيسة هي أول كنيسة تم بناءها على طراز البازيليكا في مصر، وتضم 110 أيقونات، معظمها مصنوعة من خشب الأبنوس وبعضها مطعمة بالعاج ومن ابرز الايقونات فيها لوحة الموناليزا القبطية للسيدة العذراء والسيد المسيح الطفل والقديس يوحنا المعمدان وبتتميز بأن الناظر إليها من اى اتجاه بيشعر كأنها بتنظر إليه شخصيا.

3. دير مارجرجس الروماني وبيرجع تاريخه للقرن العاشر

واحد من الكنائس القليلة جدا المبنى على شكل دائرى، واتبنت الكنيسة على قمة برج روماني قديم وبيشتهر الجزء الداخلي للكنيسة بزجاجه الملون وأعماله الخشبية المميزة.

ويعتبر الدير من أقدم الأديرة في مصر والعالم، وهو تابع لبطريركية الإسكندرية وسائر أفريقيا للروم الأرثوذكس، وبتشرف عليه وزارة الآثار المصرية، ومكانه بالتحديد جنب المتحف القبطي المجاور للكنيسة المعلقة وقريب من اشهر جامع في مصر القديمة وهو جامع عمرو بن العاص.

والدير لا يمثل فقط أثرًا تاريخيًا هامًا بالنسبة للروم الأرثوذكس فى مصر، لكن بيعد من أهم المعالم الدينية المسيحية فى إفريقيا وبيزوره الالاف و الآلاف من كل الأديان خاصة فى تذكار القديس مارجرجس فى يوم 23 أبريل من كل عام. 

والدير معروف بين جميع المصريين بأنه مكان لتحقيق الأمنيات، ففي الكنيسة الرئيسية بتوجد أيقونة عجائبية للقديس مارجرجس موضوعة داخل مزار.

وبيضم  الدير مجموعة من أيقونات لقديسين بترجع للفترة ما بين القرن 11 الى 14 وفيه سبع كنائس صغيرة بتمثل أيام الأسبوع وفيه برجان رومانيان كان بيمر خلالهما نهر النيل علشان كده موجود في الدير أقدم مقياس لنهر النيل تحت برج الكنيسة.

4. كنيسة القديسين سرجيوس وواخوس ( المعروفة بكنيسة أبو سرجة)

بترجع للقرن الرابع وتم بناءها في المكان اللى وقفت فيه العائلة المقدسة للراحة في نهاية رحلتهم إلى مصر والكنيسة فيها مغارة تحت الهيكل الرئيسي على أسم سرجيوس وواخس؛ طولها حوالي 6 متر وعرضها 5 متر وارتفاعها 2 ونصف متر تقريبا وبيؤكد المؤرخون أنها أقدم كنيسة في مصر القديمة بل وفي القاهرة كلها 

وبتستمد كنيسة أبو سرجة أهميتها في انها المكان اللى تم فيه انتخاب كتير من بطاركة الكنيسة القبطية، أولهم البطريرك اسحاق في عام 681م.

ومن اشهر معالم الكنيسة متحف الأيقونات وعدد كبير من مخطوطات نادرة وعمود يهوذا اللى بيرمز ليهوذا الاسخريوطى وده لأن كل الأعمدة في الكنيسة لها قاعدة وتاج، من الطراز الإغريقي ، لكن عمود يهوذا الإسخريوطي من غير تاج، للدلالة على أنه فقد العقل وملوش قاعدة، فليس له مستقر، اشاره ان يهوذا فقد روحه التاج وقاعدته يعنى ثباته ، جزاءً خيانته للسيد المسيح. 

وكمان عمود الدم وده كان بينزف دم اثناء الصلوات في صحن الكنيسة على مرأى كل الحضور. ومدافن الإكليروس: تم العثور على جسد القديس بشنونة عام 1990 تحت الانبل وده المكان اللى كان بيقف عليه الواعظ.

5. دير القديسة كاترين المعروف بدير سانت كاترين في جبال سيناء، شبه جزيرة سيناء وبيرجع للقرن السادس الميلادي

بيعتبر دير سانت كاترين الأرثوذكسي جزءاً من أحد مواقع التراث العالمي التابعة لليونسكو، وهو أقدم دير مسيحي في العالم لا يزال يستخدم لأغراضه الأصلية.

تم تأسيسه سنة 530 ميلاديًا بأمر من الإمبراطور البيزنطي جستنيان الأول، بهدف تأمين سلامة وحماية الرهبان اللى كانوا بيعانوا من تسلل اللصوص. 

وموقعه بالتحديد على سفح جبال سيناء، وده موقعً مقدسً لكل للديانات الإبراهيمية لأنه المكان اللى استلم فيه موسى النبي الوصايا العشر من الله .وفقًا لمنظمة اليونسكو، للدير أهمية كبيرة في دراسات العمارة البيزنطية، 

كمان بيحتوي الديرعلى مجموعة ضخمة من المخطوطات والرموز المسيحية القديمة. و المناظر الطبيعية الجبلية الوعرة التي تحيط بالدير خلفيةً مثاليةً تعزز جماله وأهميته التاريخية والدينية.

6. أديرة وادي نطرون في شمال غرب القاهرة القرن الرابع الميلادي

برية وادي النطرون او المعروفة باسم برية شيهيت  هي منطقة شهيرة جدًا في التاريخ الكنسي.. وبدأت فيها التجمعات الرهبانية من القرن الرابع الميلادي، وكان فيها عدد كبير جدا من الاديرة ..  اتبقى منهم 4 اديرة فقط وهم دير القديس انبا مقار الكبير، دير الأنبا بيشوي ، دير البراموس ، دير السريان

ويعتبر وادى النطرون أحد الأماكن التى باركتها العائلة المقدسة خلال رحلتها إلى مصر، وتعتبر الأديرة الأربعة هى الأديرة المتبقية من بين 50 ديرا قبطي كانت موجودة فى الماضى وحاليا تم تسجيل الأربع اديرة فى عداد الآثار القبطية.

وبتمثل الأديرة الأربعة بعناصرها المعمارية من كنائس وحصون ومغارات وكهوف وأسوار وموائد أثرية من بداية القرن الرابع الميلادى طراز معماري قبطي متطور بيعبر عن فترة مهمة فى تاريخ عمارة الأديرة في العالم كله.

7. كاتدرائية السمائيين

المكان: شرم الشيخ سنة البناء: 2010 م

بتعتبر كنيسة السمائيين بشرم الشيخ  تحفة معمارية فريدة من حيث العمارة والفنون القبطية واللوحات الفنيه اللي بتحويها الكنيسة 

وتم تصنيف الكنيسة بانها من اجمل ٥ كاتدائيات علي مستوي العالم  بحسب منظمة " TripAdvisor".

وبتجذب كنيسة السمائيين السياح من مختلف الجنسيات خصيصا لمدينة شرم الشيخ وأصبحت شركات السياحة بتنظم برامج مخصصة  لزيارة الكنيسة بشكل منتظم لاعجاب السياح بها و بالفن القبطي .

كنيسة السمائيين هى تحفة فنيه لها طابع  قبطي بيتغلب على الطابع الفني والمعماري جوة الكنيسة  خاصة إن  معمار الفن القبطي دمج الفن القديم بالفن الحديث.

وبتمتلئ الجدران بالرسومات القبطية على الحوائط وعلى الزجاج الملون و على الخشب بتحاكي قصص من الكتاب المقدس من بدء  خلق  ادم و حواء و قصص العهد القديم المختلفة بحسب ترتيبها الزمني و ميلاد و حياة السيد المسيح فى العهد الجديد وعلى السقف توجد رؤية القديس يوحنا لنهاية العالم

واتبنت الكنيسة في 8 سنيين من سنة 2002 وتم افتتاحها في سنة  2010 في عهد المتنيح البابا شنودة الثالث  البطريرك رقم 117 من باباوات الكنيسة القبطية

8. كاتدرائية مار مرقس بالاسكندرية

تاريخ الكنيسة بدأ لما بشر مار مرقس الرسول إنيانوس الاسكافي بالمسيحية 

اللى بعدها دعاه لبيته و تعمد هو وأهله و حول بيته لكنيسة في حياة مارمرقس نفسه حوالى سنة 60، 68 م. 

ولما استشهد مار مرقس تم دفنه في مكان تحت الكنيسة ومن بعده نشأت عادة دفن الآباء بطاركة الاسكندرية جنب جسد مار مرقس

وهى واحدة من الكنائس الأرثوذكسية المشرقية، اللى اتأسست على تعاليم القديس ما مرقس اللى بشَّر مصر بالمسيحية ، خلال فترة حكم الحاكم الروماني “نيرون” في القرن الأول.

وبترجع أهمية كاتدرائية مارمرقس بالنسبة للمسيحيين الأقباط انها الكرسي الأول التاريخي لبطريرك الإسكندرية والكنيسة القبطية ومن عصر مارمرقس للعصر الحالي مرت الكنيسة بمراحل كتير من الهدم والبناء

9. دير الأنبا أنطونيوس في البحر الاحمر

سنة البناء: 356 م

اسسه الأنبا أنطونيوس مؤسس الرهبنة القبطية في نهاية القرن الرابع الميلادي، وهو أول دير أُنشئ للرهبنة في العالم كله والقديس الانبا أنطونيوس أحد أشهر "آباء الصحراء" اللى عاشوا في الصحراء المصرية الشرقية في القرن الثالث.

وهو أقدم الأديرة في العالم، ومن أهم المعالم الأثرية في البحر الأحمر، وتم بنائه في العصر البيزنطي، ويعتبر الأنبا أنطونيوس المؤسس الأول للرهبنة مش بس في مصر لكن في العالم المسيحي كله، وعاش الأنبا أنطونيوس في مغارة داخل الجبل

ويعتبر دير القديس الانبا أنطونيوس حاليا أقدم دير مسيحي مأهول في العالم، وهو موطن للوحات ومخطوطات بييرجع تاريخها إلى القرنين السابع والثامن، بالإضافة لأكثر من 1700 وثيقة قديمة.

10- كاتدرائية ميلاد المسيح بالعاصمة الإدارية الجديدة

جنوب الحديقة المركزية في العاصمة الإدارية الجديدة بتقع كاتدرائية ميلاد المسيح، على مساحة ١٥ فدانًا، وهى اكبر كاتدرائية في الشرق الأوسط ، و بتستوعب ٨٢٠٠ شخص، وتم بناءها في زمن قياسي حوالى 23 شهر فقط من فبراير ٢٠١٧ إلى نهاية ديسمبر ٢٠١٨وكان عدد العاملين في المشروع حوالي ١٠٠٠ عامل ما بين مهندسين وفنيين وعمال،.

وروعة وجمال الكاتدرائية يكمن في انها اتبنت بمساهمة المصريين جميعا وتم افتتاح الكاتدرائية بالكنيسة الصغيرة جزئيًّا فى صلاة قداس عيد الميلاد في يناير ٢٠١٨ ، وكان الافتتاح الرسمي في ٦ يناير ٢٠١٩ .

وبتتكون الكاتدرائية من:

كنيستين كبرى وصغرى، وقاعة للمناسبات وقاعتين فرعيتين، والمعمودية واستراحة وغرفة للكنترول.و القبة الرئيسية ٤٠قطرها مترًا، وارتفاعها عن الأرض ٣٦ مترًا، وفيها منارتان بيبلغ ارتفاع كل منارة أكتر من ٦٠ مترًا. وتم تصميمهم بتشكيل من العمارة القبطية وكل منارة فيها عدد من الأجراس.

- تمت رسومات كاتدرائية ميلاد المسيح بالعاصمة الجديدة تحت إشراف مجموعة من الراهبات، وهو نفس فريق العمل اللى قام بتجديد  كاتدرائية العباسية.